هذا الرجل أحترمه
اتكلمت قبل كده عن فتى أحلامى اللى هوه حوووووده
فى الحقبقة دى كات نكتة ... موزحة - مزحة - بريئة ... أنا مش قلت فى نفس البوست انى لا أؤمن بموضوع فتى الأوهام ده؟
المهم ... حان وقت الحقيقة
أن أن اااااااااااااااااااااااه
بس أحب نبقى على وضوح من الأول ... مممم ... هوه فى كام حاجة كده ممكن نغض الطرف عنها يعنى
هو متزوج
مش مشكلة - الشرع محلل أربعة يعنى لسه قدامه تلاتة
وعندة 3 عيال
مش مشكلة برضه - الأطفال أحباب الله
وووو ... شيعى - مش مشكلة خالص ... مش مسلم بردو؟ الله ... انتو معقدينها ليه؟
... المشكلة بقى الأصعب هى ان
حووووودة
حوحو
محمود
يبقى ببساطة
يبقى ببساطة
رئيس جمهورية ايران الإسلامية
محمود أحمدى نجاد
-------------------
سيبكوا بقى من التهيييس اللى فوق ده وتعالوا اقولكوا ليه ده بالذات اللى شايفه فتى أحلام
أولا ... أنا ماليش فى السياسة ... وعارفة ان الراجل ليه معارضين كتير جوه وبره ايران ... والبيج بوس/بوش بيعد فى آخر أيامه معاه
بس الحقيقة ان فى حاجات كتير فى الراجل ده بيعترف بيها أعدائه قبل أصدقائه
عنده كاريزما فظيعة ... شخصية مغنطيسية ذات قوة جذب غير عادية ... عارفين الناس دى؟ الى تدخل المكان فتتجه ليها كل الأنظار وتتكلم فتنصت كل الآذان؟
راجل عامل زى حد السيف
عنده تواضع أصبح شبه مستحيل اليومين دول ... خصوصا لو ابن حداد بسيط مثله أصبح فجأة رئيس جمهورية
بيمشى فى الشارع بدون حماية أو حرس أو موكب
بياكل على الأرض
يربط حذائه ببساطة أمام المصورين
يلعب كورة
يتمسك بشدة بمبادئه الإسلامية فيرفض السلام على امرأة ولو كانت ضمن وفد سياسى وذات حيثية سياسية
ويعتذر لمقدم برنامج فى منتصف حوار تلفزيونى لأنه يجب أن يؤدى فريضة الصلاة
بغض النظر عن سياسته أو حكومته أو أى حاجة ... الراجل ده ببساطة رجل والرجال قليل
ولأن موضوع "رجل" ده بالذات أصبح عملة نادرة بالذات فى مجتمعنا - مش عارفة ليه بس بجد لو عديت كام راجل شوفته فى حياتى وكان راجل بجد ... لو اعتبرنا ان الرجولة مواقف وشخصية وكاريزما رجولية ... مش هيتعدوا صوابع ايد واحدة - على فكرة أنا عندى خمس صوابع بس - هتعرفوا أنا ليه بتكلم عن الراجل ده كده
مع احترامى لكل الرجالة اللى ممكن يقروا البوست ده
3 comments:
بالرغم من إني راجل
بس أنا بوافقك على رأيك مع إختلاف بسيط
هو إن الراجل ده يبقى رئيس أحلامي
تحياتي
عارفه لما بيقولو
رجل والرجال قليل
دا رأيي في الراجل ده
رجل لان مفيش رجالة خالص
هو نسي كل حاجة وافتكر حاجة واحده بس
الدين
واحنا العكس تماما
لله الامر من قبل ومن بعد
تحياتي
فعلا ده راجل محترم
ويا ريت حتى نص الرجاله توصل لان تكون نصف ماهو عليه
وربنا يثبته على الحق يا رب
Post a Comment