فتى الأحلام .. المرة دى بالعربى الغير فصيح

عايزة اقول لكم سر

أنا عمرى ما كنت من البنات اللى بيؤمنوا بموضوع "فتى الأحلام" ده خالص

طول عمرى مقتنعة ان مينفعش أحدد مواصفات للانسان اللى هحبه ... لأن ببساطة يوم ما الواحدة بتتنيل تحب .. فهى بتتنيل فعلا.. بتددلق ... بتنطس فى نافوخها ... بتتعمى فى عنيها ...بتفقد الوعى والمنطق واحتمال النطق كمان وتبقى من بتوع لا أسمع لا أرى لا أتكلم وحسنة قليلة تمنع بلاوى كتيرة
يعنى باختصار, ممكن تقعد تحلم بفاااااارس الأحلام المغوااااااار ... عريض المنكعين مشفور الشفتين (مش عارفة يعنى ايه) الى بيجلها مستحمى وبيبرق على حصان أبيض وشعره الحرير عل الخدود يهفهف ويرجع يطير

عشان أوضحلكوا الصورة أكتر, تخيلوا كده شعر ليوناردو دى كابريو على ابتسامة توم كروز على طلة ريتشارد جيرعلى قوة شوازينيجر على عنين أى واحد في دول وهو ده يبقى بالظبط الخالق الناطق اسم النبى حارسه فتى أحلام البنت من دول! تقولش هى كمان شعر مارلين مونرو على عنين نيكول كيدمان على رشاقة ناعومى كامبل على رقة وينونا رايدر على خفة دم ووبى جولدبرج
المهم بعد الأحلام - أو نقول الأوهام - دى كلها وتروح تتكعبل فى ميييين؟ والشرارة متطلعش غير مع مييييين؟
واحد كده فى طول هنيدى على صلعة يوسف داوود على كرش يونس شلبى على شفاتير اسماعيل ياسين على هبل اللمبى ... وعجبى
طب ليه تقعد البنية الغلبانة تحلم وتتمنى لما فى الآخر مش هتاخد غير نصيبها حتى لو كان الكوكتيل, أو بالأحرى عصير القصب, المحلى ده؟ المهم .. هو ده السبب الأساسى لرفضى مبدأ فتى الأحلام ... بحب أخليه مفاجعة

السر الأنأح بقى ... هو أنى مؤخرا لقيت واحد هوه بالظبط فتى أحلامى الذى لم يكن

حوووووووده
أى والله حوده
اسمه محمود ...حودة ... حوحو
بس دى قصة تانية
ابقوا معنا ... البلوج بتاعى, مش هتقدر تقفل الويندو