بنت من شبرا - الجزء الأول

طول عمرى عندى ولع خاص بتاريخ الجغرافيا ... أو جغرافية التاريخ

القصص اللى ورا الأماكن

قصص ناس عاشت فى البيوت والشوارع والمحلات

أكيد سابت بصمات

جزء ليس بيسير من ذكرياتها متعلق زى ذرات الغبار على سطح الأماكن دى

وفيما يلى مجموعة خواطر
عن أماكن وأشخاص
شوارع وحواديت
ناس عشت وسطهم
وعاشوا جوايا
حياتهم نفسها
شكلتنى
لونتنى
خلتنى أنا

أتكلم عن شبرا
مسقط رأسى ومهد طفولتى وملعب صباى
لقطات أراها فى خيالى بالأبيض والأسود
زى أفلام الستينات
زى صور أبى وأمى فى شبابهم
ومع ذلك فهى لقطات لها لون وطعم ورائحة
لقطات من زمن تانى
بحس أنه زمن واحدة تانية مش أنا

ابتدى منين الكلام عن شبرا؟
شبرا دى جمهورية لوحدها ... محافظة جوة محافظة القاهرة
مجموعة من الدويلات الصغيرة ... بيربطهم ببعض شارعين طواااااال قوى ... كل واحد فيهم اتجاه واحد .. شارع شبرا للخروج حتى النفق ... وشارع الترعة (الترعة البولاقية) للدخول حتى ما بعد ميدان فكتوريا

وشبرا يعنى بيوت قديمة ... فيها عراقة وأصالة تحسسك بالحنين لأيام عدت وناس غابت
بلكوناتها ذات الأسور الحديدية المتداخلة وسقف أرضياتها المزخرفة بعناية ... وشبابيكها من ذوات الشيش العريض المرتفع ... وسلالمها ذات الأسوار الحديدية ايضاً والدرابزين الخشبى ... والتيجان الزخرفية على قمة كل عمارة ... لو كنت شفت فيلم "أحلى الأوقات" هتعرف أنا بتكلم عن ايه

البيوت دى كان منها كتير فيلات قديمة, تم تحويلها إلى عمارات صغيرة من قبل الورثة ... ورثة بشوات وبكوات وأجانب ... بابا بيحكيلى ان شبرا زمان كانت أكثرها فيلات وقصور وجناين

شبرا يعنى بيت من تلك البيوت... بيتى ... فى شارع مسرة ... واحد من الشوارع الكبيرة المتفرعة من شارع شبرا ... يمتد غرباً حتى الكورنيش ... مروراً بسوق روض الفرج الشهير – سابقاً ... بيتنا فيه عشر طوابق ... كل دور شقتين ... كل شهر الخواجة أرنست – وهو لبنانى الأصل لكن كل الناس بتقوله "خواجة" – كان يبعت المحامى يلم الإيجارات ... حوالى خمستاشر جنيه من كل شقة ... بابا لما اتجوز كان مرتبه حوالى ستين جنيه .... أحسب أنت النسبة وأنت تعرف قيمة الشقة ... آه ه ه ه ... والشقة .... يا سيدى ع الشقة ... أربع حجرات وصالة ... "يرمح فيهم الخيل" زى مبيقولوا ... يعنى بمقاييس زماننا ده تبقى بالظبط فيلا محندقة

شبرا يعنى ذكريات طفيفة عن المترو القديم ... الترمواى طبقا للهجة المحلية أو الترام طبقا للهجة الإسكندرانية ... كان بيمشى فى شارع شبرا عكس اتجاه السيارات ... وكانت أمى تاخدنى من ايدى وأنا لسه فى حضانة ونركب فى عربة من العربات المتأرجحة البطيئة ... كنت أحب قوى أمسك فى العامود وسط العربة وأبص من الباب المفتوح على العربيات اللى ماشية عكسنا ... دلوقتى بقيت حاسة ان حياتى نفسها هى الترام ده ... ماسكة فيه وماشية عكس الناس كلها! ... المهم ... أنزل مع أمى فى محطة الدوران عشان أروح مدرستى ... نمشى فى الشارع الصغير اللى جنب سور المدرسة ... بيسموه شارع المصطوصف ... كلمة غريبة ... المصطوصف شىء زى العيادات الخارجية فى المستشفيات ... مجموعة من العيادات لتخصصات مختلفة ... لكن المصطوصف كلمة يظهر انها مقصورة على عيادات الناس الغلابة ... والمصطوصف ده كانت عملاه مدرستى ... كانت بتديره الراهبات ... خدمة مجتمع للناس الغلابة ...

شبرا يعنى مدرسة الراعى الصالح ... مدرستى ... وبناتها باليونيفورم المميز ... جيبة كحلى وقميص أبيض وكرافتة حمرا ... اللى كان بيخللى بنات شبرا الثانوية والمدارس المجاورة يبصولنا بمزيج من الحقد والغيرة بجيباتنا العايقة اللى فوق الركبة واللى كانت بتخللى أولاد شبرا الإعدادية والتوفيقية الثانوية وغيرهم يزفونا معاكسات فى الطريق من البيت للمدرسة وبالعكس ... وراهبات الراعى الصالح بزيهم المميز ايضا اللى شبه الدريل الكحلى وغطاء الرأس الكحلى

شبرا يعنى شارع طوسون ... طوسون ده كان باشا طبعا ... على الناصية سوبر ماركت النيل 2000 اللى محدش بيدخله ... وكاربت سيتى ... وتمشى لنص شارع طوسون تلاقى بتاع الرقاق ...الملفوف فى ورق بنى زى اللى كنت بجلد بيه كراساتى زمان ... اللى بابا كان بيجبلنا منه كام لفة كده فى رمضان عشان صوانى الرقاق باللحمة المفرومة وأكلتى المفضلة: الرقاق باللبن :) ... وشارع طوسون ده كان لازم نعديه بالعرض كل يوم وبابا موصلنى المدرسة بالعربية لأن شارع شبرا كان اتجاه واحد فكان لازم "نخرم" من ورا ونطلع من الشارع اللى على ناصيته بنك مصر وكشرى عرفة قدام المدرسة على طول

شبرا يعنى كشرى عرفة قصاد مدرستى ... واللى شهدت لنا الدفعات الأصغر مننا كلها بالتفوق والريادة فى تحدى مبادىء وآداب مدارس الراهبات المعهود – على الأقل وقتها كان معهود – يوم ان طلبنا "هوم دليفرى" وقت البريك ل 10 علب كشرى بالدقة! ... وكشك الحاجة الساقعة اللى جنب كشرى عرفة ... اللى عنده جميع أنواع المياه الغازية والعصائر حتى اللى شركاتها غالبا فلست وقفلت من 50 سنة ...حتى قزايز ال"سبيرو سباتس" بعلامة الدبانة اللى كانت بتظهر فى أفلام الأبيض وأسود ... لونها أحمر قانى ... تحس بعد متشربها انك واكل ولادك عالغدا ... يعععععععع !

شبرا يعنى شارع بديع ... وهو عبارة عن سوق خضار عشوائى ... مجرد تجمعات متناثرة من باعة الخضار والفاكهة ... وبسببهم من العسير مرور السيارات ودائما هناك أزمات مرورية ... وبتتفرع من شارع بديع حارة صغيرة فيها ميكانيكى الفولكس اللى كنت باروح مع بابا عنده عشان يصلح عربيته الفولكس ... بابا طول عمره كان "ركّيب" بيتلز ... يبيع واحدة ويشترى غيرها .. عدّى عليه حوالى 15 عربية بيتلز ... من موديل 51 لحد 74 ... عشان كده كان مبسوط قوى لما كبرت ودخلت الجامعة وجه وقت تنفيذ وعده ليه بعربية صغيرة فطلبت منه بيتلز ... فأصبح عم حامد- الحرامى زى ما بابا بيقول – هو الميكانيكى بتاعى بعد ما بابا اعتزل البيتلز وخضع لإلحاحات أمى بإقتناء سيارة حديثة ... والاستعاضة عن تكييف البيتلز المتمثل فى الشبك الصغير المثلث فى طرف نافذتها بتكييف حقيقى يعمل بالفريون وليس حسب هوا ربنا ... وبتتفرع من شارع بديع حارة صغيرة تانية فيها فرن العيش ... كشك أخضر كان بابا ساعات يعدى عليه لما الكسك بتاع شارع شيكولانى يكون قافل أو شطب العيش ...

شبرا يعنى شارع شيكولانى (اسمه كمان كتشنر - اسم انجليزى لشخص ما - أو شارع المستشفى) ... تلاحظ ان معظم أسماء الشوارع فى شبرا ليها طابع أجنبى ... بابا بيحكيلى انها زمان كانت مليانة جريج - يونانيين يعنى - وأرمن ويهود ... وشارع شيكولانى – ساعات بينطقوه شوكالانى – هو شارع كبير بيقطع شارع الترعة بالعرض عند البنزينة ويكمل حتى المستشفى ... الشارع ده زمان كان أميز حتة فيه عند فرن العيش اللى الناس كانت تقف عليه طوابير طويلة طلبا للعيش البلدى السخن الطازة ... قبل ما نعرف العيش الشامى والريتش بيك ! ... وقريب من الفرن كانت المطحنة اللى أمى كانت تطحن فيها السكر ... وفى أول الشارع من ناحية شارع شبرا مكتبة صغيرة كنت باشترى منها فى طفولتى قصص المكتبة الخضراء (لسه فاكرة شكل غلاف قصة الحصان الطائر) وفى سن أصغر كان بابا يشترى لى القصص الصغيرة ذات الغلاف الأحمر والخط العريض أم ربع جنيه ... وكان عشان يشجعنى على القراية يقوللى "لو قريتى القصة كلها وحكيتيهالى هزودلك المصروف" ... أو كان يوعدنى بقصص أكتر .... وهكذا ... ولما كبرت شوية كنت أشترى من نفس المكتبة قصص رجل المستحيل وملف المستقبل

...

البقية فى الحلقة القادمة إن شاء الله