طحن يا مصر

دى مش غلطة مطبعية ... دى محاولة فاشلة من صحبتنا المصرية اللى عاشت طول عمرها فى فرنسا والعربى بتاعها مكسر ...حاولت تقول "تحيا مصر" زى مبتسمعها فطلعت منها كده

ومن المفارقة العجيبة إنها بتعبر وبعفوية شديدة وبصدق تام عما تحول إليه شعور المصريين تجاه كلمة "مصر"

زمان كان الواحد يسمع اسم مصر يقول "تحيا مصر" ... "تحيا" كلما مشتقة من كلمة "حياة" ... يعنى النلس كانت عايشة ... يعنى أصغرها موظف كان عنده بيت وعيلة وبياكل لحمة على الأقل مرة فى الأسبوع وبيدرجع البيت فى جيبه اللى يكفيه لأخر الشهر من غير ميشيل هم فيدخل على أهله على الأقل بابتسامة ويدخل يصلى وهو شاكر نعمة ربه عليه

أما دلوقتى ... "مصر" ليها معانى كتييييييييييرة أوى

مصر يعنى الموظف اللى بيطحن شغل من صباح ربنا ويمكن يطلع من شغلانة على التانية ويرجع آخر اليوم مهدود مطحون وكمان يدوب معاه تمن عشاه ده ان وجد ... طحن يا مصر يا بلد الغلابة

مصر يعنى خريج الجامعة اللى اطحن مذاكرة تلاتاشر سنة مدرسة على أربع خمس ست سنين كلية من الكليات اللى بيقولوا عليها قمة واتخرج زيه زى عشرتلاف بنى آدم مطحون زيه مش لاقى شغل ... طحن يا مصر يا بلد البطالة

مصر يعنى الشاب المطحون اللى أدامه مش أقل من عشرين سنة طحن وبهدلة على ميقدر يكوم - قصدى يكون - نفسه عشان تجيلوا عين ويقدر يقول يا جواز ... ده ان مكنش قطع الخلفة خلاص من كتر الطحن والبهدلة ...طحن يا مصر يا بلد البهدلة

مصر يعنى المواطن المطحون المعصور فى المواصلات العامة ليل نهار ... من الشعبطة فى أتوبيس ماشى عالتانى ومبيهديش فى أى محطة لحسن الناس تركب وللا حاجة ... للهجوم على ميكروباص وسط الغجر عشان يلحق مكان ... للحشر وسط قوى الشعب العامل والحركة بقوة الدفع فى مترو الأنفاق ... للخناق مع سواق التاكسى ولم الشارع عليهم وهو بيبص بغل للعداد المهكع اللى محطوط ديكور ... انتيكة من عصر ما قبل الانفتاح ... طحن يا مصر يا بلد الزحمة

مصر يعنى البنت المطحونة اللى الظروف المهببه - ان كان تعليم وللا شغل وللا حتى عشان طهقانة ونفسها تشوف الشارع - خلتها تنزل من بتهم عشان تبقى فرجة لأى كلب فى الشارع ... تسمع كلمة من ده وصفارة من ده... نظرات تخرم هدومها زى الرصاص ... ويمكن واحد يمد ايده ... وجايز جدا واحد يعدى بعربية ويفتحلها الباب ... الشارع كله تحول إلى أزمة ... أزمة أخلاقية ... طحن يا مصر يا بلد الأزمة

مصر يعنى الطفل الصغير اللى أهله بيحطوه فى المطحنة - المدرسة - ويحشوا راسه الصغيرة بطحين كلام عن أخلاقيات عمره مبيشفها ولا هيشفها فى الواقع ... عن النزاهة اللى عمرة مشافها فى عين أى مدرس أتعامل معاه ... بياخد هدايا من أهله و يضغط عليهم عشان الدروس الخصوصية ... عن الصدق اللى هيوديه فى داهية لو مشى وراه لأن الواقع بيقوله: ذاكر تنجح - غش تجيب مجموع ... عن الإخلاص فىالعمل اللى هيتصدم فيهم مع أول تعامل ليه فى أى مكتب حكومى ... عن النضافة اللى عمر عينه مجت عليها فى أى شارع مصرى ... عن الوفاء وحب الوطن وهوه بيشوف الطبيعى ان اى حد فى عيلته على وش تجنيد بيجرى يجيب واسطة عشان يفلت من الجيش ... عن وعن وعن ... طحن يا مصر يا بلد النفاق

وآآآآآآآآآآآآه يا بلد آآآآآآآآآآه

طحن يا مصر... يا بلدنا