فى جنينة الأسماك

عارف امتى تعرف ان الفيلم فعلا بيوصل معنى؟ لما تدخله مع أمل انك هتشوف فيلم ممتع ... وميكونش ممتع على الاطلاق ... لكن مع ذلك تخرج منه مبسوط ... بتفكر ... وعايز تشوفه تانى

هوه ده فيلم "جنينة الأسماك" ليسرى نصرالله ... فى أول ساعة الا ربع من الفيلم كنت بكتم غيظى وحسرتى على الخمسة وعشرين جنية بالضحك ... وملل شنيع بيتسلل زى المخدر فى أعصابى مع بطء حركة الكاميرا واداء الممثلين والكادرات الثابتة
الخوف تيمة تسيطر على الفيلم بكل شخصياته ... تحسها قى علاقات كل شخصية باللى حواليها ومواقفها من الأحداث اللى بتحصل قدامها وليها ... ايه اسباب الخوف ده؟ الفيلم ما قدمش أسباب واضحة ...فكل شخصية فى الفيلم ليها ماضى مجهول ... وحاضرهم مختلف تمام الاختلاف عن بعضهم البعض ... لكن
كلهم بيجتمعوا على شىء واحد ... كلهم خايفين ... ولانهم مش عارفين يواجهوا خوفهم ... فهم بيتداروا منه وراء أقنعة ... وهى وان اختلفت ما بين مكياج " ليلى" وميكروفون برنامجها الاذاعى وبين سيارة "يوسف" اللى بيبات فيها ... أو كلام "مارجريت" عن جيرانها واحساسها الزائف بالأمان وسط شارعها وعمارتها ... الى آخر النماذج اللى قدمها الفيلم ... فهى كلها تحقق وظيفة واحدة ... هى محاولة يائسة للاختباء من عيون الناس ... ومن الخوف
والقناع اللى بنلبسه ده ... بيدارينا عن الناس وللا بيدارينا عن نفسنا؟

ليلى لما حبت تغير القناع ... غيرت المكياج ... اختارت لون الروج الأحمر الصارخ عشان يعكس جرأة وانطلاق وتحرر هى نفسها مش بتمارسهم على أرض الواقع ... ولما اكتشفت ان طبيب التخدير الواقف قدامها هو نفسه الشاب اللى كلمها فى التليفون وواجهها بخوفها ... مسحت المكياج بسرعة وعنف ... القناع وقع ... اتعرت

المؤلف اختار مهنة البطلة بذكاء شديد ... برنامج أسرار الليل بيعبر ببساطة وتلقائية عن حاجة كل انسان انه يتدارى فى سماعة تليفون و"يفضفض" شوية لحد لا يعرفه ولا شايفه ... خوف برضو ... الحاجز الوهمى عبر التليفون بيدى الانسان احساس انه متغطى حتى لو عرى نفسه وكشف كل اسراره حتة حتة
آدم وحواء متكسفوش انهم من غير هدوم غير لما فهموا انهم شايفين بعض وهم عرايا ... ما هم كانوا شايفين بعض طول الوقت ... لكنهم ماكانوش عارفين انهم كده مش متغطيين

ومهنة البطل كمان ... دكتور التخدير اللى بيستمتع بسماع حكايات الناس وكشفهم لأدق أسرارهم واحاسيسهم المجردة من أى خوف أو خجل وهم تحت تأثير البنج

هو لازم الواحد يكون فى اللاوعى عشان ما يخفش ... عشان يقدر يواجه الناس ... والأهم ... عشان يقدر يواجه نفسه؟

مع اقتراب الفيلم من نهايته كنت غصت تماما داخل الشخصيات ... لحظات الصمت بقت مليانة بصوتى أنا جوة راسى والكادرات الثابتة أفكارى نفسها كانت بتتحرك جواها ... استنى والنبى يا أ/ يسرى متقلبش المشهد عشان لسه عايزة أفكر شوية