غريبة
ساعات بحس إنى غريبة
عايشة فى بلد غريبة عنى
حافظة شوارعها وحواريها
شارع شارع
وحارة حارة
لكن مش عارفاها
أبص فى وشوش الناس
كلها شبه بعض
كلها تعبانة ومكبوتة
وطهقانة حتى منى
عيونهم فاضية ... زى أرواحهم
لو كلمت حد فيهم
يرجع لى الصدى
بيخبط ويتردد فى فراغ عقولهم
وحيدة أنا
وسط ملايين البشر
همومهم وأحلامهم
إختلافاتهم وعيوبهم
كلها سجن
لف قضبانه حواليا
مبقتش عارفة اهرب منه
كل يوم السور بيعلى
كل يوم حجمى يصغر
والمسافة بينى وبين البشر بتكبر
صوتى مش واصلهم؟
وللا كتر السكوت صم ودنهم؟
ماعادوش يسمعوا
ولو سمعوا مش راح يفهموا
كتر الألم بيولد غباء
أو إستغباء
مين يسمع لغريبة
فى بلد غريبة
تاهت منها نفسها
وسط الزحام
2 comments:
عزيزتي
أولاً أحب أطمنك إن االحاله اللي إنتي عايشه فيها دي مش حاله فرديه
دي حاله عامه .. موجوده عند ناس كتير
و يمكن ده يكون رد فعل طبيعي للإيقاع السريع جداً اللي أصبحنا عايشين فيه .. أصبحت كل حاجه حوالينا بتتغير بسرعه فبنحس إنها غريبه علينا
و الناس مابقاش عندها وقت إنها تسمع و تعبر .. دايماً مستعجلين .. و دايماً متأخرين
و يمكن ده يكون حالة سمو في الإدراك .. فتبدأ نظرة الإنسان للأشياء المحيطه به تاخد صور مختلفه و أعمق من قبل كده
و بالتالي بيحس إنه أول مره يشوف الأشياء دي
و عموماً أنا شايف إنها حاله صحيه لإن أي إنسان محترم و ملتزم لازم يحس إن المجتمع ده غريب عليه ..
فيه ناس بتقدر تتكيف مع الحاله دي .. بس الخطر إن الفكره دي تسيطر علينا تماماً و تمنعنا من الحركه
و إذا كنتي حاسه إنك بعيده عن الناس و ماحدش بيسمعك .. فإلجئي لله
ده ربنا بيقول: (و إذا سألك عبادي عني فإني قريب أجيب دعوة الداع إذا دعان)
و بصي حواليكي .. هتلاقي إنك مش لوحدك و لا حاجه
طب وبعدين؟ مهو مفيش حد بيعيش طول عمره وحيد غريب حتى فى وطنه وبين ناسه ... إحساس فظيع ... بفكر ليه بيقولوا ان أرقى الدول الغربية معدلات الإنتحار فيها عالية قوى ... لقيت انه طبيعى جدا ... اذا كان فى مصر ... بكل ما تعنيه مصر ... حتى لو عندنا بقايا مجتمع عايش قريب من بعضه ... صحاب بيهتموا بيك وعائلة حواليك ... بالرغم من ده لكن برضه الواحد حاسس انه مخنوق ... انه غريب ... ان محدش سامعه ولا شايفه ... ما بالك بالناس اللى برة دول؟ كل واحد عايش فى حاله!
واللى فعلا يحزن انى حاسه اننا ماشيين فى نفس اتجاه الغرب ... شوية شوية عمالين نبعد عن بعض ... العائلات بتتفكك ... الصحاب أصبح يغلب عليهم الطابع العملى ... كله بيجرى فى اتجاه ومش باصص حواليه
معلش ... جرعة اكتئاب زيادة لكن لمل أفكر لازم على الأقل اتكلم عشان الكلام ميخنقنيش واروح فطيس
:(
Post a Comment